தீப திருநாள்..!

இன்று - தீப திருநாள்..!

தொலை தூரத்தில்
குடும்பம், நட்பு, காதல்
துறந்து வாழும்
யாவர்க்கும் சமர்ப்பணம்..!

பயணத் தொடக்கத்தில்
தொல்லைகள் மறந்த பயணமென
சுதந்திர காற்று வாங்கும் பயணமென
பலவாறு பகல் கனவு
கண்டிடும் இள மனங்கள்!!

நிறங்கள் மறந்து
நிஜங்கள் சில நிமிடம்
பேசுவோமேயானில்...
ஊமையாகி தான் போவோம் நாம்..!

இந்த தொலை தூரப்பயணம்
சொந்தங்கள் தொலைத்த பயணம்!
வயதை விரயம் செய்த பயணம்..!
காசு பணம் சேர்த்திடவே
வாழ்க்கை தொலைத்த
இந்த பயணம்!

நல்ல நாளின்
குளியல் முடித்து திரும்புகையில்
புது துணி ஓரத்து
சந்தனம் பூசிய
தாயன்பு விடுத்த
ஒரு பயணம்..!

தேர் திருவிழா ஆர்ப்பாட்டம்
குழாய் சத்தத்தில் பாடல்
சொந்தத்தின் கூட்டம்
ஆர்ப்பரிக்கும் ஆனந்தம்
இவை யாவும்
தொலைத்த ஓர் நல் பயணம்!!

தோழன் தோழி திருமண
புகைப்படம் மட்டும் கண்டு
கலங்கும் கண்கள்..!
நிஜங்கள் காணாது
நிழல் கண்டு வாழும்
மனங்கள் -
உண்மையில் பணப்பிணங்கள்!!

இன்று - தீப திருநாள்..!
நரகாசுரன் அழிந்த நாள்!!
பணம் பொருள் தேடி
அலைந்திடும்
நம் மன நரகாசுரன்
அழியும் வரையில்..!

நாம் அற்று போன
எல்லா திருநாளும்
நம் பெற்றோர்க்கு
கரி நாளே..!

குடும்பத்தோடு வாழுங்கள்
எல்லா நாட்களிலும்
உள்ளங்களில்
தீபம் ஒளிரட்டும்..!

தீபாவளி நல்வாழ்த்துக்கள்..!